لو انتى (فاتا كومبيرا) احنا (بورتا فورتونا) - موقع اللى حصل

6 أبريل 2022
التصنيف :
حكايات الاسفار

ايطاليا – مدينة (ميلانو)


(لو انتى (فاتا كومبيرا) احنا الـ(بورتا فورتونا) – عنوان غريب وصادم . لكن هنعرف حكايتة من المغترب المصرى (سليمان حمدى القعاوى) المصرى المقييم فى ايطاليا بمدينة ميلانو. والذى قال …

فية تقليعة جديدة فى الهايبر ماركت الايطالية. وهى وجود بنات (لترويج وبيع السلع) بيسموهم (مساعدات). يعنى تشوفك محتار تساعدك ..تشوف الشيلة ثقيلة تشيل عنك .. وتزودها بدل ما تنقصها ..وتعرض عليك السلع الموجودة. تشوفك اشتريت .. دقيق .. تقوم تعرض عليك الفانيليا والكريمات. وكل مايخص الحلويات والتورتات .. على اعتبار انك اخدت دقيق لعمل حلويات. اما لو عرفت ان الدقيق لعمل بيتزا .. تعرض عليك انواع المودزريلا وكل لوازم البيتزا. يعنى زى نجيب الريحانى … (الشيئ لزوم الشيئ(.

الخلاصةانها بتروج لبيع السلع .. بس بحجة انها .. آيوتوووا (aiuto) يعنى (مساعدة). بس الناس فهمين اللعبة وعلشان كدة. بيطلقوا عليهم لقب (فاتا كومبيرا) بمعنى جنيات الشراء. والحقيقة هما بنات زى القمر … جميلات زى جنيات الاساطير. البنت من دول تلمحك (خصوصاً لما تكون لوحدك والمدام مش معاك). تفضل تتنطط حوليك .. ولو مأخدتش بالك ممكن تشترى نص المحل. وواحدة منهم لمحتنى أخذت علبتين فول … لزوم السحور جت جرى وقالت (واووو .. فول .. يبقى لازم طحينة). يابنت الجنِيَة.. عرفتى ازاى ؟؟

لو انتى (فاتا كومبيرا) احنا (بورتا فورتونا)

وفجأة لقيتها سحبتنى امام ستاند لكل انواع الطحينة. وقبل ما اتكلم دبستنى فى علبة طحينة كبيرة. وقبل ما اتكلم .. قالت .. اكيد تحتاج بهارات .. سلطات .. مهى خلاص عرفت انى بجهز لسحور رمضان. وفى لمح البصر كان الباسكت مليئ بكل انواع البهارات. ولقيتنى مسلم أمرى … وبتسحب سحب على استاند السلطات. لكن هنا تدخلت العناية الالهية .. ولمحتنى (المدام). كانت بتشترى حاجات من قسم تانى .. استوقفتنا .. وعنيها بتطق شرار .. ولا نظرات ظابط رخم فى كمين على مدخل راس غارب فى طريق الغردقة

وبصت على البنت وعلى الباسكت وقالت … آية دة ؟؟ انا عندى فول .. مش محتاجة بهارات .. وأشتريت طحينة من فضلك رجعى الحاجات دة كلها ..!!

البنت الـ(فاتا كومبيرا) وقفت متغاظة. ونظرتها بتقول .. ربنا يهدك ضيعتى الزبون. والمدام وقفت متحفزة ولسان حالها بيقول. لو انتى الـ(فاتا كومبيرا) جنيات الشراء. ثقة فى الله احنا الـ(بورتا فورتونا) …. التعويذة اللى تحرق الجنيات. وانا واقف اقول … (الانسان بطبعة دعييييييف).

وميلانو مدينة سياحية جميلة ومن اجمل الأماكن اللى بيحب يزورها السياح مركز تسوق غاليريا فيتوريو ايمانويل الثانى. ودة مبنى تاريخى تم بناؤة فى القرن الثامن عشر

ومن اجمل مناطق التنزة والتسوق ميدان كوادريلاتيرو دى اورو

والدومو بيازا يعتبر قلب المدينة النابض وفية اكبر واجمل كنيسة فى العالم

اما حديقة باركو سيمبيون فهى مقصد اللى يحب التنزة فى اماكن طبيعية ساحرة 

موقع اللى حصل
عبد الله المعلم ودرويش الرويثة

لو انتى (فاتا كومبيرا) احنا (بورتا فورتونا) – لو انتى (فاتا كومبيرا) احنا (بورتا فورتونا)

Comments are closed.

error: عفواُ .. غير مسموح بالنسخ